Bruce: Mensah síðasti leikmaðurinn sem við fáum í sumar

Knattspyrnustjórinn Steve Bruce hefur ekki setið auðum höndum síðan hann tók við starfi sínu hjá Sunderland í sumar og hefur eytt tæpum 20 milljónum punda í fimm leikmenn, þar á meðal Darren Bent frá Tottenham, Lee Cattermole frá Wigan og Fraizer Campbell frá Manchester United.

Nú virðist allt benda til þess að varnarmaður John Mensah komi einnig til félagsins á lánssamningi frá Lyon og Bruce segir hann líklega vera síðasta leikmanninn sem komi til félagsins í sumar.

„Sunderland og Lyon eru búin að ná samkomulagi og strákurinn vill koma og þetta ætti því að geta gengið í gegn áður en félagsskiptaglugganum lokar. Þetta er spuning um að fá atvinnuleyfi og alla réttu pappírana. Ég er annars mjög sáttur við þá leikmenn sem við erum búnir að fá til félagsins og ég á síður von á því að við fáum fleiri leikmenn í sumar," segir Bruce.