Hinir hækka: Olís varð af háum fjárhæðum

Nú hafa Olís, ÓB og Atlantsolía hækkað verðið á bensínlítranum hjá sér um níu krónur. Shell reið á vaðið fyrir helgi og N1 fylgdi í kjölfarið í morgun með níu króna hækkun líkt og Vísir greindi frá. Hækkunina má rekja til þess að vörugjöld á alla nýja bensínfarma voru hækkuð í maí og kemur hún til framkvæmda nú þegar birgðir fyrirtækjanna eru á þrotum.

Olís var fyrsta fyrirtækið til að klára sínar birgðir þann 18. júní, en ákvað að seinka því að hækka verðið þar til nú af samkeppnisástæðum. Forsvarsmenn fyrirtækisins hafa gagnrýnt vörugjaldahækkunina því hún mismunaði fyrirtækjum á grundvelli birgðastöðu.

Samúel Guðmundsson, framkvæmdastjóri vörustýringarsviðs Olís, segir ljóst að fyrirtækið hafi orðið af háum fjárhæðum vegna þessa, en fyrirtækið hafi slegið verulega af framlegð sinni á tímabilinu. Hann segist þó vona að viðskiptavinir fyrirtækisins hafi notið þess á meðan.

Samkvæmt upplýsingum af vef Orkunnar hefur benvínverð ekki hækkað hjá bensínstöðvum fyrirtækisins til jafns við önnur olíufélög. Ekki náðist í forsvarsmenn fyrirtækisins þegar leitast var eftir upplýsingum um birgðastöðu þess.