Hústökur skoðaðar í dómsmálaráðuneyti

Í dómsmálaráðuneytinu er verið að kanna hvernig lög um hústökur eru í nágrannalöndunum, segir Ragna Árnadóttir dómsmálaráðherra.

Enn hefur lítið sem ekkert fundist sem gefur tilefni til að endurskoða íslensk lög, en nokkuð hefur borið á hústökum síðan í bankahruninu.

„Við erum búin að kanna það hvort um þetta sé lagaumgjörð á Norðurlöndum, en svo virðist ekki vera. Það sem við höfum fundið er að stundum er heimiluð hústaka í hernaðar­tilgangi, eða heimiluð hústaka ólæstra húsa, sem kallað er „squatting“, segir hún.

Ekkert hafi fundist um slík lög í Hollandi og Bretlandi, en þar munu ákveðnar gerðir hústöku vera leyfðar. „Það virðist frekar djúpt á þessu í lögunum,“ segir Ragna.

Spurð um pólitíska afstöðu til þessa, í ljósi þess að tóm hús grotna um víða borg, segist Ragna telja að borgaryfirvöld ættu að skoða það í samvinnu við ráðuneytið, vandamálið snúi að báðum; húsin séu í niðurníðslu og brotist sé inn í þau.

„Ef þetta snýst um það að hús séu að grotna niður, þá segir það sig sjálft að það er ekki mál fyrir dómsmálaráðuneytið. Það væri frekar mál ráðuneytisins þegar hópur manna fer inn í hús sem einhver á og í óleyfi. En málið myndi horfa öðruvísi við ef eigandinn leyfði það. Hvert er þá viðhorf hans til hústökunnar? Svo er spurning hvort borgin og skipulagsyfirvöld vilja gera eitthvað til að hindra niður­níðslu,“ segir Ragna.

Skammt er liðið frá hústöku við Vatnsstíg, þar sem ónotað hús var gert upp og hústökufólkið bauð upp á ýmsa þjónustu við almenning, þangað til lögreglan kom og henti fólkinu út, handtók suma og stórskemmdi um leið húsið.

„Punkturinn í því máli er sá að þar er það eigandinn sem sættir sig ekki við að einhver sé í húsinu hans, eins og þetta horfir við mér,“ segir Ragna.

Hún var þá spurð um rök ýmissa hústökumanna, um hvort ekki mætti líta til almannahagsmuna og láta þá koma á undan hagsmunum manns sem skemmir hús með því að halda því tómu.

„Spurningin er sú hvort það sé einhver almannahætta af starfseminni, maður getur haft göfugar hugsjónir og góðan tilgang en getur maður þess vegna farið inn í annarra manna hús? Og ef þú átt hús, er þá skylda fyrir þig að nýta það eða ekki? Hversu langt nær eignarrétturinn? Nær hann ekki til þess að þú getir ráðstafað þinni eign eins og þú vilt? En á móti koma þessi umhverfissjónarmið,“ segir Ragna.