Ferjan Baldur leysir Herjólf af hólmi frá 13. september

Breiðafjarðarferjan Baldur mun leysa Herjólf, fólksflutningaskip Eyjamanna, af hólmi í um hálfsmánaðartíma frá 13. til 28. september en ekki frá 6. september eins og gert hafði verið ráð fyrir.

Herjólfur átti að fara í slipp þann 6. september og vera fram til 21. september en nú munu lagfæringar á skipinu frestast um eina viku og fer Herjólfur því ekki í slipp fyrr en 13. september.

Á þessu tímabili mun siglingum á Breiðafirði frá Stykkishólmi til Flateyjar verða sinnt með öðru skipi frá Sæferðum fjórum sinnum í viku.

Föst áætlun milli Stykkishólms og Brjánslækar verður ekki á þessu tímabili og verður fólk því að fara landleiðina á milli Vesturlands og sunnanverða Vestfjarða á þessu tímabili.