Geysir Green bauð kínverskum samstarfsmanni í Grímsá

Forsvarsmenn Geysis Green Energy buðu kínverskum samstarfsmanni í veiði í Grímsá í Borgarfirði fyrir tveimur vikum. Íslandsbanki, sem er í eigu ríkisins, er stór eignaraðili að Geysi Green. Forstjóri fyrirtækisins segir veiðina hafa verið ákveðna að vel athuguðu máli.

„Við erum með starfsemi í Kína eins og löngum er þekkt og okkar forsprakki þar var hér á landi. Við fórum með hann upp í Grímsá og leyfðum honum að sjá Ísland utan skrifstofuveggjana" segir Ásgeir Margeirsson, forstjóri Geysis Green Energy. „Skutumst þarna upp eftir og reyndum að veiða en það gekk illa. Hann[Kínverjinn] fékk reyndar einn - maríulaxinn og borðaði hann á staðnum."

Maðurinn sem um ræðir heitir Zhu Jiang. Hann hefur að sögn Ásgeirs starfað mikið fyrir Geysi í Kína. „Hann hefur staðið sig alveg rosalega vel og lyft okkar starfi í Kína á hærra plan," segir Ásgeir.

Aðspurður hvort ekki sé hætta á að veiðiferðir sem þessar fari illa í almenning segir Ásgeir: „Auðvitað þarf maður að hugsa rosa vandlega hvað maður gerir og hvað ekki. Þetta var gert að vel athuguðu máli vel yfirlögðu í ljósi þess sem við vorum að gera í Kína. Þess vegna leyfðum við okkur í þessu tilviki að skreppa þarna uppeftir."

Aðspurður um kostnaðinn segir hann daginn í Grímsá kosta um hundrað þúsund krónur. Hann segist ekki sjá eftir þeim útgjöldum. „Nei auðvitað ekki, en maður samt sem áður passar sig að stíga varlega til jarðar. En í samhengi við það sem við erum að gera er þetta ekki stór kostnaður. Það var lágt ris á þessu og ekkert í líkingu það sem verið hefur hér á árum áður."

Ásgeir segir að Zhu Jiang hafi notað tímann til að hitta stjórn ENX Kína ehf, sem er eitt af dótturfyrirtækjum Geysis, sem og stjórnendur Geysis Green.