Reknir fyrir að gefa börnum stuð

Tveir bandarískir fangaverðir hafa verið reknir úr starfi eftir að hafa gefið börnum frá fimm ára upp í sautján ára stuð með rafbyssum. Atvikið átti sér stað í síðustu viku í fangelsi í Flórída í Bandaríkjunum. Börnin voru í skoðunarferð en foreldrar þeirra starfa í fangelsinu.

Annar fangavörðurinn lét börnin mynda hring og haldast í hendur. Svo gaf hann einu barni stuð sem leiddi út í það næsta og svo framvegis.

Í hinu tilvikinu gaf fangavörðurinn hverju og einu barni stuð til þess að sýna fram á hverju fangarnir gætu átt von á höguðu þeir sér ekki skikkanlega.

Mikil reiði greip um sig á meðal foreldra barnanna þegar upp komst hvernig verðirnir höfðu beitt vopnum sínum. Fangelsisstjóri sagði athæfið algjörlega óafsakanlegt og voru mennirnir því reknir úr starfi.