Spáð stjórnarskiptum í Japan

Svo virðist vera sem ríkisstjórn undir stjórn forsætisráðherrans Taro Aso í Japan muni stórtapa þingkosningum sem haldnar verða um helgina.

Taro tilheyrir frjálslynda demókrataflokknum í Japan en sá flokkur hefur farið með völdin í þessu næst stærsta hagkerfi veraldar í 53 af síðustu 54 árum.

Nú virðist þjóðin vera búinn að fá nóg og ætlar að hleypa japanska lýðræðisflokknum að.

Athygli vekur að í frjálslynda demókrataflokknum býður Shinjiro Koizumi sig fram en faðir hans er Junichiro Koizumi sem er einn farsælasti forsætisráðherra Japans frá því eftir stríð. Syninum er spáð þingsæti, aðallega vegna nafns síns, en hann mun ólíkt föður sínum byrja feril sinn í stjórnarandstöðu.

Skoðanakannanir benda til stórsigurs lýðræðisflokksins nema eitthvað meiriháttar gerist. Sigri lýðræðisflokkurinn verður Yukio Hatoyama líklegast forsætisráðherra landsins.