Benitez: Leikmenn gerðu of mörg mistök

Rafa Benitez, stjóri Liverpool, sagði sína menn hafa gert sig seka um of mörg mistök í leiknum gegn Aston Villa í kvöld sem síðarnefnda liðið vann, 3-1.

Þetta var annað tap Liverpool á níu dögum en liðið tapaði fyrir Tottenham í fyrstu umferð tímabilsins. Liverpool vann þó Stoke um helgina en þetta var fyrsti sigur Villa á tímabilinu.

„Við sköpuðum fullt af færum á fyrstu 20 mínútum leiksins og spiluðum vel. Þá fengum við mark á okkur og gerðum fullt af mistökum í kjölfarið," sagði Benitez eftir leik.

„Við töpuðum þessum leik og vitum að við þurfum að bæta okkur. Mér fannst að við áttum möguleika í leiknum þegar að Fernando Torres skoraði en vítaspyrnan gerði út um þá. Það var enginn vafi á því að þetta hafi verið víti."

„Við vitum líka að við þurfum að fara til Bolton um helgina og vinna. Ef það gerist gæti allt breyst hjá okkur og sjálfstraustið aukist."