Fjölmiðlar vita meira en ég

„Það er bara eitt orð sem ég á yfir þetta og það er vanhæfni," segir Birgitta Jónsdóttir, þingflokksformaður Borgarahreyfingarinnar um þá staðreynd að öll fylgiskjöl með Icesave frumvarpinu, sem leggja á fyrir Alþingi á fimmtudag, séu ekki komin fram.

Hún segir óráðsíu að fara að skrifa undir eitthvað sem er ekki einu sinni ljóst. „Maður vill gefa sér góðan tíma til að skoða öll gögn málsins og það er með ólíkindum að maður sé að sjá og heyra fréttir í fjölmiðlum sem eiga að mínu mati að liggja fyrir hjá þingmönnum.“

Frumvarpið verður lagt fyrir Alþingi á fimmtudag og þá kemur í ljós hvort ríkið samþykki þann lánasamning sem nú liggur fyrir varðandi Icesave skuldbindingar ríkisins.

„Við þurfum öll að standa saman, bæði stjórn og stjórnarandstaða. Það gengur ekki að það sé unnið svona flausturslega í svona stóru máli og við verðum að fá gögnin tímanlega til að geta tekið upplýsta ákvörðun. Ætli ég fái ekki fréttirnar fyrst hjá ykkur áður en mér verður kunnugt um þau fylgiskjöl sem ríkisstjórnin liggur á og vill ekki upplýsa stjórnarandstöðuna um,“ sagði Birgitta að lokum í viðtali við Vísi.