Nistelrooy of dýr fyrir Tottenham

Hermt er að Harry Redknapp, stjóri Spurs, hafi sótt það nokkuð stíft að fá framherjann Ruud Van Nistelrooy til félagsins áður en félagaskiptaglugginn lokaði.

Redknapp vildi losa sig við Roman Pavlyuchenko og fá Hollendinginn í staðinn. Það gekk ekki eftir.

Pavlyuchenko hefur kvartað yfir fáum tækifærum það sem af er vetri en honum er mikið í mun um að standa sig vel í vetur svo hann komist á HM næsta sumar með Rússum. Redknapp hefur nú sagt að hann muni fá sín tækifæri.

Það er áhugavert að Redknapp hafi sótt stíft að fá Nistelrooy sem var meiddur nánast alla síðustu leiktíð. Hnéð á honum er illa farið og óvissa með framhaldið.

Þess utan vildi hann fá 100 þúsund pund í vikulaun sem Spurs þótti einfaldlega of mikið.

Á endanum þótti því gáfulegra að halda Rússanum og sleppa því að fá rándýran og heilsulausan Hollending til félagsins. Það hefði getað endað með ósköpum.