Dunne kominn til Aston Villa

Í dag var gengið endanlega frá félagaskiptum Richard Dunne frá Manchester City til Aston Villa en síðarnefnda félagið keypti hann á sex milljónir punda.

Félagaskiptaglugginn lokaði reyndar klukkan fimm síðdegis í gær en þar sem það þótti sýnt að öll skjöl hefðu borist til enska knattspyrnusambandsins í tæka tíð var hægt að samþykkja félagaskiptin.

Dunne var fyrirliði City en hann er varnarmaður, rétt eins og James Collins sem kom til Aston Villa frá West Ham fyrir skömmu.

Félagið þurfti þó á varnarmönnum að halda eftir að Zat Knight var seldur til Bolton og Martin Laursen þurfti að leggja skóna á hilluna vegna meiðsla.

Líklegt er að Dunne spili sinn fyrsta leik með Aston Villa í grannaslagnum við Birmingham þann 13. september næstkomandi.