Rooney á eftir að bæta markamet Charlton

Gary Neville hefur mikla trú á félaga sínum hjá Man. Utd, Wayne Rooney. Hinn afar leikreyndi Neville spáir því að Rooney muni slá magnað markamet Bobby Charlton hjá félaginu.

Charlton skoraði 249 mörk á ferli sínum hjá United. Rooney á nokkuð í land en hann hefur skorað 102 mörk fyrir United.

„Það er vissulega enn langt í að hann komist að Charlton en hann á svo sannarlega möguleika á því," sagði Neville.

„Hann mun spila fjölda leikja í viðbót fyrir þetta félag og ef hann helst heill þá er þetta möguleiki. Hann hefur hæfileikana í að slá þetta met."

Mörkin 102 setja Rooney í átjánda sætið yfir markahæstu leikmenn í sögu Man. Utd.