Zaki: Ég vonast til að fá annað tækifæri á Englandi

Framherjinn Amr Zaki er ekki búinn að gefa upp alla von á að snúa aftur í ensku úrvalsdeildina en leikmaðurinn sló eftirminnilega í gegn á láni hjá Wigan á síðasta keppnistímabili.

Zaki stóð sig það vel fyrir jólin í fyrra að hann var orðaður við félög á borð við Aston Villa, Liverpool og Real Madrid en náði ekki að sína sitt rétta andlit síðustu mánuðina auk þess að lenda upp á kant við knattspyrnustjórann Steve Bruce vegna agavandamála. Zaki er hins vegar fullur iðrunnar og vonast eftir því að fá annað tækifæri.

„Ég vill enn og aftur koma á framfæri þökkum til Steve Bruce og Dave Whelan [stjórnarformanns Wigan] fyrir að hafa gefið mér tækifærið á síðusta keppnistímabili og mér finnst mjög leiðinlegt hvernig þetta fór allt á endanum.

Ég vil koma aftur til Englands og ég vonast til þess að fá annað tækifæri. Ég veit að mörg félög eru að leita sér að framherja og ég það er ágætt að koma því á framfæri að möguleikinn á að fá mig á láni frá Zamalek er aftur fyrir hendi núna líkt og í fyrra," segir Zaki í samtali við Sky Sports fréttastofuna.