Segist hafa yfirheyrt fanga í mesta bróðerni

Bandaríska alríkislögreglan FBI hefur nú teflt fram einum liðsmanni sínum sem fullyrðir að hann hafi náð viðamiklum upplýsingum upp úr liðsmanni hryðjuverkasamtakanna al-Qaeda án þess að beita til þess vafasamari aðferðum en að ræða við manninn um daginn og veginn. Þessi tiltekni lögreglumaður er reyndar líbanskur að uppruna, talar reiprennandi arabísku og er vel lesinn í Kóraninum. Engu að síður gæti hann orðið lykilvitni verði rannsóknarnefnd stofnuð til að fara ofan í saumana á meintum hrottaskap alríkislögreglunnar og leyniþjónustunnar CIA.