Sigurður Ingi vill á þing

Sigurður Ingi Jóhannsson, dýralæknir, hefur ákveðið að gefa kost á sér til forystu á lista Framsóknarflokksins Í Suðurkjördæmi.

Fram kemur í tilkynningu að Sigurður Ingi hefur lengi tekið virkan þátt í starfi Framsóknarflokksins. Jafnframt hefur hann setið í sveitarstjórn Hrunamannahrepps í 15 ár í vor, þar af sjö ár sem oddviti og 4 ár sem varaoddviti. „Sigurður Ingi hefur mikla reynslu af sveitarstjórnarmálum og tekur virkan þátt í pólitísku starfi sveitarfélaga á Suðurlandi með setu í ýmsum stjórnum og nefndum. "

„Með óbilandi trú á gildum Framsóknarflokksins, vill Sigurður Ingi leggja sitt af mörkum í því mikla uppbyggingarstarfi sem framundan er á Íslandi. Það starf krefst óeigingirni, heiðarleika, dugnaðar og skynsemi. Með framboði sínu leggur Sigurður Ingi í það starf, fram krafta sína, reynslu og þekkingu á stjórnmálum," segir í framboðstilkynningu.

Sigurður Ingi er dýralæknir og einn af eigendum og starfsmönnum Dýralæknaþjónustu Suðurlands. Hann býr í Syðra - Langholti, Hrunamannahreppi, fæddur og uppalinn Árnesingur. Sambýliskona hans er Elsa Ingjaldsdóttir, framkvæmdastjóri, og eiga þau samtal 5 börn.