Þolendur beri ekki einir byrðina

„Okkur hjá Aflinu samtökum gegn kynferðis og heimilisofbeldi er kunnugt um þennan mikla fjölda kvenna sem búa við þessar hörmulegu aðstæður og staðfestir þessi rannsókn reynslu okkar," segir í tilkynningu sem Aflið samtök gegn kynferðis- og heimilisofbeldi sendu frá sér vegna nýrrar rannsóknar sem bendir til að tæpur fjórðungur íslenskra kvenna hefur orðið fyrir andlegu, líkamlegu eða kynferðislegu ofbeldi á heimili sínu.

„Von okkar er sú að niðurstaða rannsóknarinnar veki almenning til umhugsunar. Nausynlegt er að tryggja á erfiðum tímum að niðurskurður lendi ekki þeim félögum og samtökum sem starfa á þessum vettvangi, heldur þarf að efla stuðninginn og leggja aukna áherslu á forvarnir og fræðslu. Látum ekki þolendurna eina bera byrðina," segir ennfremur í ályktuninni.