Þrjú ný svínaflensutilfelli staðfest hér á landi

Þrjú ný tilfelli inflúensu A, eða svínaflensunnar, eru staðfest hérlendis. Þau eru orðin sjö talsins alls.

Samkvæmt upplýsingum frá sóttvarnalækni er um að ræða fólk á aldrinum 18-19 ára, karl og konu sem komu heim frá Ástralíu og konu sem kom frá Bandaríkjunum. Öll veiktust þau eftir heimkomuna en ekki alvarlega. Tekin voru sýni í greiningu og jákvæð niðurstaða fékkst í gær.

Í tilkynningu er því haldið fram að dánarhlutfall af völdum inflúensunnar sé svipað og í árstíðabundinni inflúensu og í langflestum tilfellum gangi einkennin sjálfkrafa yfir.

Þá hvetur sóttvarnarlæknir lækna til að taka sýni hjá sjúklingum með inflúensulík einkenni, einkum þeim sem eru nýkomnir frá löndum þar sem inflúensan er í mestri útbreiðslu.

Alls hafa tæplega 120 þúsund tilfelli verið greind í heiminum, þar af 14.300 í Evrópu. Alls hafa 589 látist af völdum veikinnar.

Tilkynningar um viðbúnað vegna svínaflensunnar eru birtar á influensa.is, auk nánari upplýsinga.