Fyrstu við­brögð við tölum úr nýjustu könnun Maskínu

Þriðja Pallborð fréttastofu Vísis og Sýnar í aðdraganda þjóðaratkvæðagreiðslu fór fram í dag en þar mættu þau Kristrún Frostadóttir forsætisráðherra og Jónas Hagan Guðmundsson, fjárfestir og einn stofnenda Já, til að sjá sem fulltrúar já-ara en Guðrún Hafsteinsdóttir formaður Sjálfstæðisflokksins og Hilmar Veigar Pétursson, forstjóri Fenris Creations, áður CCP, mættu fyrir hönd nei-ara.

Vonar að fólk mæti á kjörstað

Niðurstöður nýrrar könnunar Maskínu voru frumsýndar í upphafi Pallborðsins en samkvæmt henni hyggjast 51,3 prósent þeirra sem taka afstöðu segja já en 48,7 prósent segja nei. Í síðustu könnun Maskínu var bilið meira en þrátt fyrir að breytingar séu innan skekkjumarka er hlutfall þeirra sem hyggjast segja nei að aukast.

„Þetta er hnífjafnt og það er ómögulegt að ráða í það hvernig þetta fer á laugardaginn,“ sagði Kristrún Frostadóttir forsætisráðherra í Pallborðinu. Hún hafði einnig orð á því að það væri einmitt meðal annars vegna þessa sem ákvörðunin hafi verið „sett í fangið á þjóðinni“.

Hún bindi vonir við að fólk mæti á kjörstað enda hafi það gríðarlega mikil áhrif á niðurstöður atkvæðagreiðslunnar en hver svo sem niðurstaðan verði muni hún virða hana og vinna með hana.

Í spilaranum hér fyrir neðan er hægt að horfa á upptöku af Pallborðinu.

Verði alltaf mjög mjótt á munum

Því næst tók Jónas Hagan Guðmundsson, fjárfestir og einn stofnenda Já til að sjá, til máls en hann sagði gott að sjá að forskotið væri enn já-urum í vil þrátt fyrir að vera minna en áður.

Sagan sýni þó að kosningar sem þessar geti oft spilast út á annan hátt en kannanir sýni, svo sem í þjóðaratkvæðagreiðslum í Noregi og Svíþjóð. Það verði alltaf ansi mjótt á munum. Hilmar Veigar Pétursson, forstjóri Fenris Creations, áður CCP, gat sammælst Jónasi hvað það varðar.

Hins vegar þætti honum að það sjái ekki fyrir endann á rifrildi hreyfinganna að lokinni þjóðaratkvæðagreiðslu. Þetta sé spurning um „fólk sem vill ekki fara í ferðalag og svo fólk sem vill kíkja í pakkann“ en það verði alltaf „voða óskýrt“ sama hvernig fari á laugardaginn.

Sé vongóð fyrir laugardeginum

„Augljóslega hvorn veginn sem þetta fer í þessu ferðalagi þá held ég að við verðum að þræta um þetta allan tímann,“ sagði hann og ítrekaði að ef munurinn verði ekki gríðarlegur já-urum í vil muni nei-arar halda áfram að berjast fyrir sínu.

Fyrstu viðbrögð Guðrúnar Hafsteinsdóttur formanns Sjálfstæðisflokksins voru svipuð og hinna en hún sagði niðurstöður könnunarinnar „í anda þess sem við höfum séð, þær hafa allar sýnt voða lítinn mun.“

Hún nefndi því næst sem dæmi að hér á árum áður hafi kannanir fram að atkvæðagreiðslu tengt Icesave sýnt niðurstöður öfugt við það sem svo kom upp úr kjörkössunum. Hún sagðist svo vera mjög vongóð fyrir niðurstöðum laugardagsins.