Tamíltígrar segja leiðtoga sinn á lífi

Tamíltígrar á Sri Lanka segja það alrangt að leiðtogi þeirra hafi fallið í bardögum við stjórnarher landsins um liðna helgi. Þvert á móti sé hann í felum á öruggum stað. Stjórnvöld á Sri Lanka standa hins vegar fast við fyrri yfirlýsingar um fall hans og birtu í morgun myndir í sjónvarpi sem eru sagðar sýna lík leiðtogans.

Mahinda Rajapaksa, forseti Sri Lanka, kom síðan í þinghúsið í höfuðborginni Colombo í morgun þar sem hann lýsti formlega yfir sigri í 27 ára borgarastyrjöld í landinu.

Tamílar hófu vopnaða uppreisn í landinu í júlí 1983 og kröfðust sjálfstæðs ríkis í norður- og austurhluta landsins. Þeir börðust af mikilli hörku og féllu tugþúsundir í átökum stjórnarhersins og uppreisnarmanna Tamíltígranna. Tígrarnir játuðu sig sigraða á sunnudaginn eftir harða orrustu á þrjú hundruð fermetra svæði þar sem síðasta vígi þeirra var.

Tamílar um allan heim voru síðan slegnir þegar stjórnvöld á Sri Lanka greindu frá því í gær að Vellupillai Prabhakaran, stofnandi og leiðtogi Tamíltígranna, hefði fallið í átökunum ásamt syni sínum og arftaka og mörgum öðrum háttsettum foringjum samstakanna.

Margir neituðu að trúa því að leiðtoginn væri fallinn og í morgun var því vísað á bug í yfirlýsingu frá alþjóðadeild tígranna. Þar sagði að leiðtoginn væri á lífi og í felum. Öryggi hans hefði verið tryggt og hann geti því áfram stýrt baráttu tígranna.

Skömmu áður var greint frá því í ríkisfjölmiðlinum á Sri Lanka að lík Prabhakarans hefði fundist í morgun. Þegar voru birtar nærmyndir af líki sem stjórnarherinn segir af honum. Það var sagt gert til að kveða niður allar sögur um að hann væri enn á lífi.

Þetta fæst ekki staðfest endanlega af óháðum fulltrúum eða vestrænum miðlum þar sem starfsemi hjálparsamtaka og erlendra fjölmiðla hefur verið mjög takmörkuð á ástakasvæðinu.