Hughes hrósar eigendum Manchester City

Knattspyrnustjórinn Mark Hughes hjá Manchester City segir samband sitt við forráðamenn félagsins verði bara betra og betra.

Miklar vangaveltur voru um framtíð Hughes eftir að Abu Dhabi Group fjárfestingarfélagið eignaðist City fyrir síðasta keppnistímabil en Hughes segir samstarfið við stjórnarformanninn Khaldoon Al Mubarak ganga vel og að framtíðin sé björt hjá félaginu.

„Khaldoon er frábær karakter og ég held að við séum alltaf að læra meira og meira á hvorn annan. Hann hefur mikinn metnað líkt og eigandinn Sheikh Mansour og við viljum með tímanum byggja farsælt lið. Ég sagði aldrei að við myndum ná betri árangri strax en við gerðum á síðustu leiktíð. Þetta snýst um að byggja rétt upp og það tekur tíma," segir Hughes.

City hefur þegar keypt Gareth Barry á 12 milljónir punda og fastlega búist við því að fleiri nýjir leikmenn bætist í hópinn á næstu vikum.

Richard Dunne virðist hins vegar vera á leið frá Borgarleikvanginum í Manchester eftir frekar dapurt tímabil með félaginu en Stoke, Tottenham og Sunderland eru talin vilja fá þennan 29 ára gamla varnarmann.