Nóg komið af órökstuddum hræðsluáróðri

Ólafur Elíasson, einn af forsvarsmönnum InDefence hópsins, segir nóg komið af hræðsluáróðri og órökstuddum fullyrðingum ráðamanna varðandi Icesave samkomulagið. Hann segir kjánalegt að halda því fram að nágranna- og vinaþjóðir fari í viðskiptastríð við okkur samþykki Alþingi ekki samkomulagið við bresk og hollensk stjórnvöld.

Gylfi Magnússon, viðskiptaráðherra, fullyrti í kvöldfréttum Stöðvar 2 í gær að Ísland muni einangrast á alþjóðavísu og verða Kúba norðursins ef ekki verður fallist á Icesave samkomulagið. Svigrúm Íslendinga í þessum efnum sé því ekki mikið.



Fjarstæðukenndar fullyrðingar

Ólafur segir þetta algjörlega fjarstæðukennt og það hljóti að vera skylda fjölmiðla að spyrja gagnrýnna spurninga þegar ráðamenn setji fram fullyrðingar eins og viðskiptaráðherra gerði í umræddu tilviki. Ólafur fullyrðir að lönd eins og Þýskaland, Noregur og Svíþjóð muni ekki fara í viðskiptastríð við Íslendinga skrifi þeir undir samkomulagið við Breta og Hollendinga.

„Felli Alþingi samninginn þá þarf einungis að gefa út yfirlýsingu um að Íslendingar vilji standa við innistæðutryggingar og semja um málið en ekki á þessum nauðungarkjörum," segir Ólafur.

Vill öll gögn upp á borðið



Ólafur segir mikilvægt í ljósi fullyrðinga ráðamanna að þrýst sé á þá að staðfesta samkomulagið að sá þrýstingur komi uppi á yfirborðið. Mikilvægt sé að fram komi hverjir hafi þrýst á staðfestingu samkomulagins og með hvaða hætti.

„Eru einhverjar samþykktir þjóðaþinga eða erlendra ráðamanna á bak við þennan þrýsting," spyr Ólafur. „Eru þær skráðar í skjalasöfnum ráðuneyta?"

Þá vill Ólafur vita hvort að Alþjóðagjaldeyrissjóðurinn hafi beitt sér í málinu með beinum hætti og þá hvernig.

Hægt er að horfa á viðtalið við Gylfa Magnússon, viðskiptaráðherra, í kvöldfréttum Stöðvar 2 í gær hér.