Segir af sér vegna lágflugs yfir Manhattan

Louis Caldera, maðurinn sem er ábyrgur fyrir lágflugi bandarísku forsetavélarinnar, Air Force One, í síðasta mánuði, hefur sagt upp störfum hjá hvíta húsinu.

Flugið vakti mikla athygli en íbúar New York fylltust skelfingu þegar þeir sáu flugvélina hringsóla í kringum Frelsisstyttuna á Manhattan. Sitthvoru megin við flugvélina flugu tvær herþotur.

New York-búar hafa svo sannarlega ekki gleymt hryðjuverkunum þann 11. september, og því voru háhýsi rýmd og skelfing greip um sig.

Í ljós kom að Louis Caldera hafði heimilað myndatöku á flugvél forsetans við styttuna.

Barack Obama tók við uppsögninni og mun hún taka gildi þann 22. apríl.