Ólafur Þór Hauksson: Er hlutlaus varðandi afsögn ríkissaksóknara

„Hann beindi fyrirspurn til okkar um það hvort Eva talaði í nafni embættsins og það gerir hún ekki," segir sérstakur saksóknari efnahagshrunsins, Ólafur Þór Hauksson, spurður hvort það sé rétt að hann hafi látið Valtý Sigurðsson, ríkissaksóknara fá skriflegt plagg um að Eva Joly talaði ekki í krafti embættisins þegar hún krafðist afsagnar Valtýs.

Þá kom einnig fram í viðtali við Valtý að krafa Evu endurspeglaði ekki hug Ólafs Þórs. Hann segir það oftúlkun: „Ég hef aldrei gefið upp mína skoðun í málinu."

Ólafur segir að það hafi verið óskað eftir staðfestingu á því hvort Eva talaði fyrir hönd embættisins og Ólafur staðfesti að svo væri ekki, það væri aðeins einn talsmaður og það væri hann sjálfur.

Eva er ráðgjafi en ekki talsmaður.

Þegar blaðamaður ræddi aftur við Valtý staðfesti hann að það stæði ekkert um skoðun Ólafs í bréfinu.

Eva hefur gengið skörulega fram og krafðist þess að Valtýr segi upp störfum vegna vanhæfis. Hann gegnir embætti ríkissaksóknara sem er æðsta ákæruvald hér á landi og því heyrir embætti sérstaks saksóknara undir embættið.

Sjálfur hefur Valtýr lýst sig vanhæfan í hruni bankakerfisins.