Adriano með tvennu í „Fla-Flu“ derby-slagnum í Rio

Brasilímaðurinn Adriano er greinilega ekki dauður úr öllum æðum þrátt fyrir að hafa hætt hjá Inter á fremur dræmum nótum í apríl.

Framherjinn snjalli gerði sér lítið fyrir og skoraði bæði mörk Flamengo í 2-0 sigri gegn Fluminense í grannaslag í Rio de Janeiro í Brasilíu í gærkvöldi.

„Keisarinn" eins og hann er kallaður á heimaslóðum sínum skoraði tvö mörk á tólf mínútna kafla snemma í síðari hálfleik fyrir framan 78.409 áhorfendur á Maracana-leikvanginum en þetta var metaðsókn á leik í brasilísku úrvalsdeildinni á yfirstandandi keppnistímabili.

„Ég reyni bara að gera mitt allra besta til þess að sjá til þess að ég verði í landsliðshópi Dunga fyrir lokakeppni HM,“ sagði Adriano ómyrkur í máli í leikslok í gær.