Ekki móðurfélagsábyrgð og því ekki hægt að ganga að Magma ef illa fer

„Þá er það mikið áhyggjuefni að móðurfélagsábyrgð Magma er ekki á skuldabréfinu heldur einungis veð í bréfum í HS orku," segir í bókun Sigrúnar Elsu Smáradóttur, borgarfulltrúa Samfylkingarinnar og fulltrúa flokksins í stjórn Orkuveitu Reykjavíkur, vegna sölu á hlut fyrirtækisins í HS orku til kanadíska félagsins Magma Energy.

Stjórn Orkuveitunnar samþykkti á fundi sínum í dag kaupsamning við Magma Energy um 16,58% hlut OR og tæplega 15% hlut Hafnarfjarðarbæjar í HS Orku. Samningurinn er gerður með fyrirvara um samþykki borgarráðs og borgarstjórnar Reykjavíkur. Fulltrúar minnihlutans í stjórninni greiddu atkvæði gegn samningnum og gagnrýna þeir þann skamma tíma sem stjórnarmönnum gafst á að kynna sér efni samningsins.

Í samtali við fréttastofu sagði Sigrún Elsa slæmt að ekki skuli vera móðurfélagsábyrgð á skuldabréfinu. Ef illa fer verður ekki hægt að ganga að Magma. Þetta er mikið áhyggjuefni, að mati Sigrúnar Elsu.

Að hennar mati er forkastanlegt að stjórnarmönnum hafi einungis verið gefin klukkustund til að kynna sér innihald samningsins. „Tilboðið sem fyrir liggur er óhagstætt fyrir OR og áhættan sem því fylgir allt of mikil. 70% tilboðsins er greitt með skuldabréfi, sem greiðist upp með einni greiðslu eftir sjö ár," segir í bókun borgarfulltrúans.