Agger frá í sex vikur vegna bakmeiðsla

Varnarmaðurinn Daniel Agger er búinn að missa af fyrstu tveimur leikjum Liverpool á keppnistímabilinu vegna bakmeiðsla. Nú hefur verið staðfest að danski landsliðsmaðurinn muni gangast undir hnífinn til þess að fá bót meina sinna og verður því ekki leikfær aftur fyrr en eftir sex vikur.

Knattspyrnustjórinn Rafa Benitez hefur átt í erfiðleikum með miðvarðarstöðuna þar sem Martin Skrtel meiddist á kjálka á dögunum og verður frá í einhvern tíma en hinn ungi og efnilegi Daniel Ayala lék við hlið Jamie Carragher í sigurleiknum gegn Stoke á dögunum.

Þá hefur Liverpool tryggt sér gríska landsliðsmanninn Sotirios Kyrgiakos og hann gæti komið inn í liðið fyrir leikinn gegn Aston Villa á mánudag.