Ráðherrar vilja að stofnanir niðurgreiði strætó

Umhverfisráðherra og samgönguráðherra hvetja stofnanir og fyrirtæki til að taka upp heildstæða samgöngustefnu. Ráðherrarnir leggja til að opinber fyrirtæki og stofnanir niðurgreiði fargjöld í strætó fyrir starfsmenn sína til að draga úr notkun einkabíls. Þá vilja þeir kanna mögulega aðkoma ríkisins að verkefninu ókeypis í strætó.

Ríkisstjórnin samþykkti á fundi sínum í morgun að hefja gerð áætlunar um sjálfbærar samgöngur með það að markmiði að draga úr þörf fyrir einkabílinn. Áætlunin verður unnin á vegum Svandísar Svavarsdóttur, umhverfisráðherra, og Kristjáns Möller, samgönguráðherra, en auk þess verður haft náið samstarf við fulltrúa fjármálaráðherra vegna breytinga sem lúta til dæmis að skatta- og gjaldamálum, að fram kemur í tilkynningu frá umhverfisráðuneytinu.

Haft er eftir Svandísi í tilkynningunni að mörg verkefni á sviði umhverfismála kalli á skýra framtíðarsýn, nýja hugsun og stundum flóknar breytingar á laga- og reglugerðarumhverfi. Önnur verkefni séu hins vegar einfaldari í framkvæmd og mikilvægt sé að hefja nú þegar undirbúning og framkvæmd slíkra verkefna.

Samkvæmt samþykkt ríkisstjórnarinnar er lögð áhersla á að fyrstu aðgerðir komi til framkvæmda fyrir næstu áramót.