Enn er óánægja hjá starfsmönnum Ríkisútvarpsins

Töluverðrar óánægju gætir meðal starfsmanna Ríkisútvarpsins. Stofnunin hefur þurft að ganga í gegnum erfiðan niðurskurð. Margir starfsmenn telja hins vegar að viðbrögð yfirstjórnar sýni lítil tengsl við starfsfólkið og skort á skilningi á eðli starfseminnar.

Í haust voru fréttastofur hljóðvarps og sjónvarps sameinaðar. Nokkurrar bjartsýni gætti með þá ráðstöfun og sáu margir tækifæri í henni. Heimildir Fréttablaðsins herma að fréttamönnum finnist sameiningunni hins vegar ekki hafa verið fylgt nógu vel eftir. Gallarnir við hana séu meira áberandi en kostirnir.

Það feli í sér að möguleikar miðlanna séu ekki nýttir sem skyldi. Útvarpsfréttamenn, sem eru óvanir því að myndskreyta fréttir sínar, nýti miðilinn ekki eins og hægt væri. Þá séu sjónvarpsfréttamenn óvanir að hugsa í myndlausum fréttum. Ekki hafi verið gert nóg í að þjálfa fréttamenn upp í að nota nýja miðla.

Páll Magnússon útvarpsstjóri segir ánægju með sameiningu fréttastofanna. Hins vegar hafi ytri aðstæður haft áhrif á innleiðingartímabil. „Skömmu eftir sameiningu hrundi bankakerfið og allt fór á hvolf hjá öllum fréttastofum. Fyrir vikið gafst starfsmönnum ekki eins mikill tími til að tileinka sér nýja tækni. En í því er meiri ögrun fólgin og starfsmenn hafa höndlað þetta vel."

Skera þurfti starfsemi RÚV töluvert niður, ekki síst þar sem ríkisvaldið hafði ekki skilað þeim fjármunum sem gert hafði verið ráð fyrir í samningum. Sumum þykir útfærslan ekki bera vott um þekkingu og skilning á hlutverki stofnunarinnar. Sem dæmi er tekið að samningum við verktaka var að mestu leyti sagt upp og þýðir það að leita verður meira í það efni sem stofnunin á fyrir. Á sama tíma hefur verið fækkað á verkstæði því sem heldur utan um þann tækjabúnað sem þarf til að hægt sé að spila gamla efnið.

Launamál stofnunarinnar hafa verið nokkuð í umræðunni og síst jókst ánægja þegar starfsmenn þurftu að taka á sig launalækkun. Starfsmönnum með langan starfsaldur að baki finnst þeir bera lítið úr býtum fyrir vinnu sína.

Páll segir að eðlilegt sé að óánægja sé með niðurskurð, launalækkun og uppsagnir. „Ég hlusta á kvartanir yfir því og skil. Ég hef hins vegar ekki heyrt neinar tillögur að annarri útfærslu um niðurskurð hjá okkur."

kolbeinn@frettabladid.is