Keypti Manchester United hús fyrir foreldra Paul Pogba?

Jean-Pierre Louvel, forseti Le Havre, er ekki ánægður með aðferðir enska liðsins Manchester United til að ná í hinn sextán ára gamla Paul Pogba. Louvel ásakar United um að hafa mútað foreldrum stráksins en hann var í viðtali við franska blaðið French football.

Louvel heldur því fram að Manchester United hafi gefið báðum foreldrum Paul Pogba hundrað þúsund evrur og þau hafi fengið nýtt hús að auki. Allt til þess að þessi 16 ára gamli miðjumaður kæmi til Old Trafford. Louvel segir Progba hafa einnig fengið loforð um laun sem hann fengi þegar hann næði 17 ára aldri.

United segist hafa farið eftir öllum FIFA-reglum en félagið er að reyna að sleppa við sömu örlög og Chelsea sem má ekki kaupa leikmenn fyrr en árið 2011. „Þetta er algjört rugl. Við höfum gert allt samkvæmt reglum FIFA," sagði talsmaður félagsins.