Mátti keppa á brimbretti í veikindafríi

Það er í góðu lagi að taka þátt í brimbrettakeppni þegar maður er í veikindaleyfi frá vinnu. Þetta er niðurstaða ástralsks dómstóls í máli Shanes Bevan sem er keppnismaður í íþróttinni þar syðra. Bevan tók sér nokkurra daga frí frá vinnu vegna bakverkja árið 2007 en hann vann sem hlaðmaður hjá flugfélagi. Bakverkirnir hindruðu þó ekki þátttöku hans í brimbrettamóti sem hann ákvað að taka þátt í þegar afi hans dó og heiðra minningu hans með því.

Vinnuveitendurnir komust að þessu og ráku Bevan þegar. Dómstóllinn studdist við álit læknis, sem staðfesti að keppnin hefði gert heilmikið fyrir bak brimbrettakappans og í raun hefði hann komist fyrr til vinnu vegna þessarar hreyfingar. Flugfélagið þarf því að greiða honum bætur.