Vilja stefgjöld fyrir pyntingatónlist í Guantanamo

Bandarísk mannréttindasamtök berjast nú gegn því að tónlist sé notuð sem pyntingaraðferð í Guantanamo-fangelsinu. Herferðin gengur undir nafninu núll desibel eða zero db og vísar heitið til hávaðaeiningarinnar desibels.

Ætlun samtakanna er að fá tónlistarmennina Bruce Springsteen og Eminem í lið með sér við að vekja athygli á því að fangar Bandaríkjahers í Guantanamo-fangelsinu á Kúbu hafa verið brotnir niður fyrir yfirheyrslur með háværum tónum hljómsveitanna AC/DC, Aerosmith og Metallica svo eitthvað sé nefnt en sérstaklega þykir þó illkvittni bandarískra leyniþjónustumanna keyra úr hófi fram þegar þeir neyða fanga sína til að hlýða á lagið úr barnaþáttunum Sesame Street.

Þá hefur tónlist með sérstaka ameríska skírskotun farið einstaklega illa í hina austurlenskættuðu stríðsfanga og má þar nefna Born in the USA með Springsteen og hinn gamalkunna slagara Don McLean, American Pie.

Herferðin hefur vakið verðskuldaða athygli þótt illa hafi gengið að fá tónlistarmenn til þess að taka þátt í henni. Hins vegar hafa sumir tónlistarmenn brugðist ókvæða við er þeim bárust fregnirnar til eyrna en það er þó ekki endilega af vorkunnsemi gagnvart föngunum. Trent Reznor úr hljómsveitinni Nine Inch Nails ætlar til dæmis að stefna bandarísku leyniþjónustunni og krefja hana um stefgjöld fyrir að pína fanga með verkum hans.