Hubble eins og nýr eftir viðgerðina

Hubble-sjónaukinn er kominn á sinn venjubundna sporbaug um jörðu eftir að hafa gengið í endurnýjun lífdaganna.

Þetta mikla auga geimferðastofnunarinnar NASA, sem heitir í höfuðið á stjörnufræðingnum Edwin Powell Hubble, er nú í toppstandi eftir alls 36 klukkustunda viðhaldsvinnu sem fór fram í fimm geimgöngum áhafnar geimskutlunnar Atlantis.

Fáir geimleiðangrar hafa átt sér annan eins aðdraganda en áhöfnin æfði þrotlaust mánuðum saman fyrir ferðina enda gera menn ekki við stjörnusjónauka í 575 kílómetra hæð eins og að skipta um dekk. Aðallinsa Hubble er 2,4 metrar í þvermál og gripurinn allur vegur 13 tonn. Hann ferðast að jafnaði með rúmlega 26.000 kílómetra hraða á klukkustund og fer hringinn um jörðina á 96 klukkustundum.

David Leckron, aðalstjórnandi Hubble-áætlunarinnar hjá NASA, segir að varla sé til sú grein innan stjörnufræðinnar sem sjónaukinn hefur ekki með einhverju móti varpað ljósi á þau 19 ár sem hann hefur sveimað yfir höfðum okkar. Til að mynda staðfesti Hubble tilvist svonefndrar hulduorku sem er þáttur í sífelldri útþenslu alheimsins.

Ekki má gleyma þeim áhrifum sem Hubble hefur haft á kenningar stjörnufræðinga um hvernig alheimurinn varð til en gegnum sjónaukann má greina fyrirbæri sem áttu sér stað aðeins 500 milljónum ára eftir að það gerðist eða fyrir rúmum 13 milljörðum ára.