Craz-E Burger nýjasta sprengja Bandaríkjamanna

Í Massachusetts í Bandaríkjunum hefur nú litið dagsins ljós sú hitaeiningasprengja sem seint verður slegin út og sameinar að auki tvo vinsæla rétti þarlendra, hamborgarann og kleinuhringinn. Þetta er svonefndur Craz-E Burger, blendingur beikonborgara og kleinuhrings. Útfærslan er þannig að í stað hamborgarabrauðs kemur grillaður kleinuhringur þakinn smjöri og glassúr en á milli er hamborgarinn með öllu tilheyrandi. Þetta fyrirbæri mælist 1.500 hitaeiningar og slagar hátt upp í meðalhitaeiningaþörf konu yfir daginn sem er 2.200 hitaeiningar samkvæmt viðmiðunum Lýðheilsustöðvar.