Grái fiðringurinn gerir hjónaband Berlusconis að engu

Forsætisráðherrafrúin á Ítalíu hyggst skilja við Silvio Berlusconi eiginmann sinn, eftir því sem fullyrt er í fjölmiðlum þar í landi.

Ástæða hjónaskilnaðarins er að sögn kunnugra að grái fiðringurinn, eins og áhugi miðaldra karlmanna á yngri konum er oft kallaður, hefur leikið forsætisráðherrann grátt. Þolinmæði eiginkonunnar er á þrotum og nú vill hún burt. Berlusconi hefur ekki viljað tjá sig um smáatriði málsins við fjölmiðla en segir að hann sé að ganga í gegnum sársaukafullt tímabil í einkalífinu.

Ítalskir fjölmiðlar segja að eiginkona Berlusconis hafi þegar haft samband við lögfræðing og vilji að skilnaðurinn gangi í gegn sem fyrst.