Verðlaunaverkefni Íslendings léttir hjartveikum lífið

Lokaverkefni Önundar Jónassonar, 28 ára véltæknifræðings úr Ingeniorhojskolen í Árósum, mun vonandi létta fjölda hjartveikra lífið. Hann þróaði ásamt dönskum samnemanda sínum nýja gerð mítralhrings, sem kemur verulega að gagni þegar hjartavefur deyr og skipta þarf um hluta hjartans.

Önundur útskrifaðist með b.s. gráðu síðastliðinn laugardag með hæstu mögulegu einkunn. Auk þess hlaut hann ásamt félaga sínum verðlaun frá samtökunum Dansk Ingenior Service, en þau verðlauna framúrskarandi lokaverkefni á sviði tækni- og verkfræði árlega. Verðlaunin voru að upphæð 25 þúsund krónur danskar, eða 600 þúsund íslenskar.

Einn af forstjórum Danske bank á meðal annars sæti í dómnefndinni. Við mat dómnefndarinnar er ekki síst litið til þeirra viðskiptalegu tækifæra sem í hugmyndinni felast.

Hæstánægður með árangurinn



„Ég held að það sé ekki hægt að óska sér neins betra, þetta er frábær endir á náminu og vonandi jafngóð byrjun á því næsta," segir Önundur í samtali við fréttastofu, en hann kemur til með að hefja mastersnám við Reyst í orkufræði næsta haust.

Honum fannst sérstaklega gaman að vinna að hinum örsmáa hring, því yfirleitt eru viðfangsefni véltæknifræðinga talsvert stærri um sig.

Byltingarkennd hugmynd

Eldri gerðir mítralhringsins eru gerðar úr málmi sem hætta er á að brotni eftir ákveðinn tíma. Því þurfa sjúklingarnir oft að gangast undir margar aðgerðir til að skipta um mítralhringinn. Hin nýja plastútgáfa er hinsvegar bæði endingarbetri og miklum mun ódýrari, að því er Önundur segir í samtali við fréttastofu. Það þarf því ekki að undra að danskir fjölmiðlar hafa veitt hugmyndinni athygli.

Næsta skref í þróun hringsins eru svokallaðar in vivo prófanir, það er prufur á lifandi dýrum. Þá verður hringurinn prófaður á svínum og hefst framleiðsla í kjölfarið ef niðurstöðurnar eru jákvæðar.

Verkefnið unnu þeir félagar í samstarfi við Skejby sygehus, sem er háskólasjúkrahús í Árósum og meðal stærstu spítala Evrópu.