Fyrri rannsókn FME bundin við haustið

Rannsókn Fjármálaeftirlitsins (FME) á meintum innherjasvikum Baldurs Guðlaugssonar, fyrrverandi ráðuneytisstjóra í fjármálaráðuneytinu, einskorðaðist í upphafi við atburði í september í fyrra. Við endurupptöku málsins síðasta sumar, í kjölfar ábendinga, beindist rannsóknin að atburðum sem gerst höfðu fyrir september.

Þetta skýrir hvers vegna fundargerðir samráðshóps Seðlabankans um fjármálastöðugleika frá því sumarið 2008, sem síðan hafa reynst innihalda mikilvægar upplýsingar, voru ekki skoðaðar áður en fyrri rannsókn var hætt. Þetta segir Gunnar Þ. Andersen, forstjóri Fjármálaeftirlitsins.

Fréttablaðið greindi frá því í gær að fundargerðirnar hefðu ekki verið teknar til athugunar í fyrri rannsókn þrátt fyrir að Jónas Fr. Jónsson, sem var forstjóri FME, hefði setið í samráðshópnum. Ábending sem barst í sumar um efnisatriði í fundargerðunum varð til þess að FME hóf rannsókn málsins á ný.

Gunnar segir að rannsóknin hafi þá verið víkkuð út og ákveðið verið að taka lengra tímabil til skoðunar, sem síðan hafi leitt til þess að sérstakur saksóknari rannsaki nú málið.

Gunnar vildi í samtali við Fréttablaðið í gær ekki leggja mat á það hvort Jónas hefði átt að láta víkka út rannsóknina þegar í upphafi í ljósi þeirra upplýsinga sem hann bjó yfir eftir setuna í samráðshópnum. Gunnar segist ekki vilja fara í „díalóg við fyrrverandi forstjóra um málið fram og til baka".

Þó væri hefðbundið að frumrannsókn á meintum innherjasvikum tæki fyrst og fremst til daganna í kringum meint brot.

Í yfirlýsingu sem Jónas sendi frá sér vegna fréttar blaðsins í gær sagði hann að þegar hann hefði látið af störfum forstjóra FME hefði rannsóknin á máli Baldurs ekki verið komin á það stig að vera á borði forstjóra. Fundargerðir samráðshópsins hefðu verið í skjalaskrá FME og hann hefði bent rannsakendum á að kynna sér efni þeirra.

Fullyrðing Jónasar um fundargerðirnar stangast á við það sem kom fram í máli Björns Þorvaldssonar saksóknara við málflutning í héraðsdómi í vikunni. Þar sagði Björn, að því er segir í Viðskiptablaðinu, að FME hefði þangað til nú í sumar ekki haft aðgang að fundargerðunum. Ekki hafa fengist skýringar á þessu misræmi.

Fréttablaðið sendi Jónasi fyrirspurnir um málið í gær en fékk ekki svar.stigur@frettabladid.is