Snilldarlausnin hangir á herðatré

„Við vildum ekki hefta sköpunargáfuna. Fólk má gera hvað sem er sem eykur virði hlutar sem alla jafna er einskis virði,“ segir Þórhildur Birgis­dóttir, framkvæmdastjóri alþjóðlegu Athafnavikunnar. Vikan hefst 16. nóvember næstkomandi og lýkur 22. nóvember.

Hitað var upp fyrir Athafnavikuna í hádeginu í gær þegar hlutur var afhjúpaður á netsíðunni www.athafnavika.is sem gegnir lykilhlutverki í hugmyndasamkeppninni Snilldarlausnir – Marel. Þátttakendur mega gera hvað sem þeir vilja við herðatréð að því gefnu að virði þess aukist. Taka má þátt í keppninni hvenær sem er. Það eina sem þarf er að finna herðatré, taka myndband af virðisaukningu þess og senda inn á netsíðu keppninnar í síðasta lagi á hádegi 15. nóvember.

Þórhildur segir ýmsa hluti hafa verið nýtta með árangursríkum árangri. Fréttablaðið greindi frá því í vikunni að efri hluti af plastflösku hefði verið settur undir borðfót í sambærilegri hugmyndasamkeppni við Stanford-háskóla og var tappi flöskunnar nýttur til að stilla borðið af.

„Í raun má gera hvað sem er. Ég vonast til að sem flestar og fjölbreyttastar hugmyndir muni skila sér,“ segir Þórhildur.

Myndbönd frá hugmyndasamkeppninni verða sýnd á meðan á Athafnavikunni stendur og mun Katrín Jakobsdóttir menntamálaráðherra veita verðlaun fyrir bestu hugmyndina á lokahátíðinni 22. nóvember.

Þórhildur segir erfitt að meta hve margir muni taka þátt í Athafnavikunni.

Þegar séu rúmlega fimmtíu viðburðir skráðir, allt frá litlum samkomum til sameigin­legs fagnaðar hannyrðafólks um allt land sem muni taka höndum saman í tilefni af útgáfu prjónabókar. „Við stefnum í það minnsta á að hafa mestu þátttökuna, miðað við höfðatölu,“ segir Þórhildur.jonab@frettabladid.is