Tvöföldun Vesturlandsvegar brýnni en Vaðlaheiði

„Það er mjög bagalegt fyrir umferðaröryggi ef fresta á aðgerðum á Suður- og Vesturlandsvegi," segir Ágúst Mogensen, forstöðumaður Rannsóknarnefndar umferðarslysa (RNU).

Samtök sveitarfélaga á höfuðborgarsvæðinu og bæjarráð Mosfellsbæjar mótmæla harðlega forgangsröðun verkefna samgönguráðherra í vegagerð. Bæjar­ráðið vill að tvöföldun á Vestur­landsvegi, frá Hafra­vatnsvegi að Þingvallavegi, verði í forgangi.

„Þörfin fyrir vegbætur er mun brýnni þar en á Vaðlaheiði," segir Haraldur Sverrisson, bæjar­stjóri Mosfellsbæjar.

Engin forgangsröðun hefur átt sér stað, samkvæmt Kristjáni Möller samgönguráðherra í Fréttablaðinu í gær. Kristján hefur hins vegar sagt að undir­búningur Vaðlaheiðar­ganga sé langt á veg kominn og verkið sé tilbúið til forvals. Undir­búningur verka á höfuðborgarsvæðinu sé styttra á veg kominn.

„Þetta er einfaldlega rangt. Öll gögn voru tilbúin á framkvæmdum við kaflann og til stóð að bjóða verkið út í júlí," segir Haraldur.

Ágúst segir RNU leggja mikla áherslu á að næstu skref í umferðar­öryggismálum séu á Suður- og Vesturlandsvegi, þar séu flest banaslys. Nefndin hefur ekki fjallað um öryggi við Vaðlaheiði.

Tólf banaslys voru á Suðurlands­vegi, á kaflanum Reykjavík-Selfoss, árin 2002-2008 og sjö á Vesturlandsvegi, á kaflanum Reykjavík-Borgarnes, samkvæmt skýrslu RNU. Eitt banaslys var á veginum um Víkurskarð, sem Vaðlaheiðar­göng eiga að koma í staðinn fyrir, á þessu tímabili, samkvæmt Vegagerðinni.

Sem dæmi um hversu dýr framkvæmd Vaðlaheiðargöng eru keyra um 1.190 bílar á dag um vegkaflann sem göngin leysa af hólmi, samkvæmt Vegagerðinni. Það eru 434 þúsund bílar á ári, ellefu sinnum færri en fara um Vesturlandsveg. Áætlaður kostnaður við göngin, sem eru um 7,5 kílómetrar, er um tíu milljarðar, samkvæmt Vegagerðinni. Framkvæmdin tekur allt að fjögur ár og kostar um 2,5 milljarða á ári.

Um 13 þúsund bílar keyra vegkaflann á Vesturlandsvegi á dag, samkvæmt upplýsingum frá Vegagerðinni. Það eru 4,8 milljónir bíla á ári. Framkvæmdin kostar um 450 milljónir og því gerir það um 94 krónur á hvern bíl á ári. Vegurinn er um tveir kílómetrar.

Sveitarstjórnarmenn á Suðurlandi funduðu með samgönguráðherra í fyrradag og vildu að breikkun Suðurlandsvegar yrði í forgangi. Bjóða átti fyrsta kaflann út í sumar sem liggur frá Litlu kaffistofunni að Reykjavík, um sex kílómetra. Gert er ráð fyrir að kostnaður sé um 1.200 milljónir. Á ári keyra um 2,96 milljónir bíla á vegarkaflanum.