Eygló: Steingrímur skýlir sig á bak við samkeppnislög

Þingmaður Framsóknarflokksins telur að fjármálaráðherra skýli sér á bak við samkeppnislög þegar hann neiti að upplýsa um verðmat á verðtryggðum og gengistryggðum lánum nýju bankanna. „Fjármálaráðherra virðist telja að þetta séu upplýsingar sem komi almenning ekki við."

Eygló Harðardóttir, þingmaður Framsóknarflokksins, lagði um miðjan síðasta mánuð fyrirspurn fyrir Steingrím J. Sigfússon, fjármálaráðherra, á Alþingi og vildi vita um verðmat á verðtryggðum og gengistryggðum lánum nýju bankana til heimila og fyrirtækja sem hlutfall af höfuðstól. Hún telur eðlilegt að þessar upplýsingar liggi fyrir þar sem íslenskur almenningur sé fjárfestir í nýju bönkunum.

Í svari fjármálaráðherra segir að nýju bankarnir séu hlutafélög í eigu ríkisins sem teljast til einkaréttarlegra aðila og njóti lögbundinnar verndar um viðskiptalegar upplýsingar. Að mati fjármálaráðuneytisins lúta þær upplýsingar sem Eygló óskaði eftir ekki að málefnum sem talist geta opinber. Þá verði einnig að líta til þess að nýju bankarnir starfi í samkeppni sín á milli, og við önnur fyrirtæki á fjármálamarkaði, og því gæti það skaðað hagsmuni félaganna verði upplýsingarnar gerðar opinberar.

Eygló bendir á að henni hafi einnig verið neitað að sjá verðmat endurskoðunarfyrirtækisins Deloitte/Oliver Wyman á eignasöfnum nýju bankanna.

„Ég er rosalega ósatt og tel þetta ekki vera í anda þess gegnsæis þess gegnsæis sem núverandi ríkisstjórn hefur verið að boða," segir þingmaðurinn.