Icesave afgreitt úr fjárlaganefnd

Icesave frumvarpið var afgreitt úr fjárlaganefnd á fjórða tímanum í dag með stuðningi allra aðila nefndarinnar nema Höskuldar Þórhallssonar, þingmanns Framsóknarflokksins.

Guðbjartur Hannesson, formaður fjárlaganefndar, segir að samþykktur hafi verið nýr fyrirvari við ríkisábyrgðina þess efnis að hún taki ekki gildi nema að Bretar og Hollendingar samþykki þá efnahagslegu- og lögfræðilegu fyrirvara sem þegar hafi verið gerðir.

Gert er ráð fyrir að þriðja umræða um Icesave málið hefjist á Alþingi á fimmtudaginn. Guðbjartur Hannesson, formaður fjárlaganefndar, segist ánægður með það hversu langt málið sé komið og vonast til þess að þingið afgreiði málið þannig að menn geti farið að fá frið fyrir Icesave umræðunni.