Samfylkingin í Kópavogi: Gunnar verður að víkja

Bæjarfulltrúar Samfylkingarinnar í Kópavogi ítreka fyrri kröfu sína um að Gunnar I. Birgisson axli ábyrgð og víki sem bæjarstjóri eftir að hann hafi gerst sekur um að hygla stórlega fyrirtæki í eigu dóttur hans. Nú sé reynt að láta umræðuna snúast um skýrslur endurskoðenda og lögfræðiálit en ekki sé rætt um pólitíska og siðferðislega ábyrgð. Þetta kemur fram í tilkynningu frá Guðríði Arnardóttur, oddvita Samfylkingarinnar í bæjarfélaginu.

„Krafa okkar fyrir hönd bæjarbúa er óbreytt: Að bæjarstjóri Kópavogs axli ábyrgð og víki sæti. Persónulegir hagsmunir hans mega ekki standa í vegi fyrir því að bæjarstjórn sé starfhæf nú þegar unnið er að lausn á þeim flóknu úrlausnarefnum sem liggja fyrir bæjaryfirvöldum,“ segir í tilkynningunni.

Þar segir jafnframt að það sé skylda allra bæjarfulltrúa að horfa frá einka- og flokkshagsmunum og koma að stjórn bæjarins með hagsmuni bæjarbúa að leiðarljósi.

Bæjarfulltrúarnir skora á bæjarfulltrúa Sjálfstæðisflokksins og Ómar Stefánsson, oddvita Framsóknarflokksins, að axla ábyrgð í málinu en ekki leggja blessun sína yfir vinnubrögð af slíku tagi.