Golfari lést af völdum eldingar

Karlmaður á sjötugsaldri lést samstundis þegar að hann fékk eldingu í sig þar sem hann var staddur á golfvelli í Skørping á Norður-Jótlandi í dag. Annar maður varð einnig fyrir eldingunni en talið er að hann muni lifa af. Þetta hefur danska ríkisútvarpið, DR, eftir lögreglunni þar í landi. „Hann dó samstundis og við gátum ekki lífgað hann við," sagði vaktstjóri í samtali við DR.

Mennirnir voru ásamt öðrum kunningja þeirra í golfi þegar mikið óveður gerði. Þeir ætluðu því að hætta að spila og skella sér í nálægan golfskála. Það vildi ekki betur til en svo að þegar þeir voru á leiðinni til baka laust eldingunni niður í þá. Þriðji maðurinn slasaðist ekkert.