Þjálfari Skotanna á enn á hættu að vera rekinn

Skoska landsliðið á enn möguleika á að komast á HM í Suður-Afríku næsta sumar en formaður skoska knattspyrnusambandsins er þó ekki nægilega sáttur með starf þjálfarans George Burley. Skotar unnu 2-0 sigur á Makedóníu um helgina.

Skotar eiga eftir að mæta Hollandi í lokaleik sínum í riðlinum og nægir stig úr þeim leik til þess að tryggja sér annað sætið í riðlinum og sæti í umspilinu.

„Við höfum ekki rætt framtíð hans. Við skulum bara bíða þangað til að leikirnir eru búnir. Við verðum í betri aðstöðu til að ákveða um framtíð þjálfarans eftir miðvikudaginn," sagði George Peat, formaður skoska sambandsins.

„Við réðum George til fjögurra ára en við sögðum líka að við ætlum að fara yfir stöðuna eftir tvö ár þegar undankeppni HM væri lokið. Þetta er í fyrsta sinn sem hann þjálfar landslið og það eru alltaf viðbrigði fyrir þjálfara sem eru vanir því að hafa leikmenn sína hjá sér alla daga," sagði Peat.

Peat talaði um að skoska liðið væri að fara í gegnum kynslóðarskipti sem hefði gert Burley erfitt fyrir. „Hann er búinn að gera góða hluti miðað við það að við höfum enga stjörnuleikmenn," sagði Peat sem var mjög ánægður með seinni hálfleikinn í sigrinum á Makedóníu.