Fjölskylduerjur þingmannsins

Munnleg málsmeðferð fór fram í Héraðsdómi Suðurlands í gær í máli Eggerts Haukdals, fyrrverandi alþingismanns, gegn frænku hans og eiginmanni hennar. Fyrir tæpum þremur árum seldi hann bróðurdóttur sinni og manni hennar jörð sína ásamt húsi.

Skilyrði fyrir sölunni var að hann fengi að búa áfram í húsinu endurgjaldslaust. Hafa frænkan og eiginmaður hennar sagt að þau hafi mátt þola áreiti af hálfu Eggerts og hafi því ákveðið að skilja að íbúðir þeirra. Deilt er um lögmæti þess í málinu.

Eggert var þingmaður fyrir Sjálfstæðisflokkinn á árunum 1978 til 1995. Utan flokka var hann þó frá 1979 til 1980. - vsp