„Ótrúlegt að sitja undir svona skít“

Magnús Sædal byggingarfulltrúi Reykjavíkurborgar segir áreiti á opinbera embætismenn alvarlegt brot. Málningu var hent í hús hans í nótt og ókvæðisorð krotuð til að mótmæla fegrunarátaki borgarinnar.

„Ég kvaddi til lögreglu og mun fylgja þessu máli eftir alla leið. Áreiti á opinbera embættismenn er mjög alvarlegt brot," segir Magnús.

Mennirnir sendu tölvupóst á fjölmiðla nú fyrir skömmu þar sem þeir lýsa ódæðinu á hendur sér. Þeir segja borgina hafa gengið of hart fram í fegrunarátakinu þar sem um 500 einstaklingum hafi verið gefinn tímafrestur til 1. ágúst til að lagfæra garða og hús.

„Magnús og allir þeir aðrir sem standa á bakvið þetta átak: Takið til í ykkar óreiðuhausum og látið annað fólk í friði," segir í póstinum sem er nafnlaus.

Magnús hafði ekki séð póstinn. "Ég held að þessir menn ættu frekar að taka til í sínum eigin haus," segir hann um ummæli þeirra.

Eiginkona Magnúsar sagði í viðtali við Vísi að dóttir þeirra hefði vaknað í nótt, heyrt læti og séð nokkra menn hlaupa burt frá húsinu. Auk þess að kasta málningu á það hafi verið krotuð ókvæðisorð eins og: 1,2 og Reykjavík, farðu í rassgat.

„Það er ótrúlegt að þjónusta borgarbúa Reykjavíkur og sitja svo undir svona skít," segir Magnús.