63 ár frá árásinni á Hiroshima

Japanir minnast þess að fyrsta kjarnorkuárás veraldarsögunnar var gerð á borgina Hiroshima þennan dag árið 1945.

Klukkan 23.15 að kvöldi 6. ágúst árið 1945 sleppti bandaríska sprengjuflugvélin Enola Gay kjarnorkusprengju sem hafði verið gefið gælunafnið Litli drengurinn yfir japönsku borginni Hiroshima.

Líklega hefur gælunafn sjaldan verið jafn óviðeigandi. Litli drengurinn drap 140 þúsund manns.

Þrem dögum síðar var annarri sprengju með annað gælunafn sleppt yfir Nagasaki. Feiti maðurinn drap áttatíu þúsund íbúa borgarinnar. Nær allir, bæði í Hiroshima og Nagasaki, voru óbreyttir borgarar, menn konur og börn.

Fjölmargir erlendir gestir eru komnir til borganna í dag til þess að minnast þessara atburða með einnar mínútu þögn.

Friðarsamtök víða um heim minnast einnig þessara örlagadaga. Í Reykjavík verður það gert með kertafleytingu á Tjörninni. Sú athöfn hefst klukkan hálf ellefu í kvöld.