Vígreifir í Washington

Þrýstihópurinn Truckers and Citizens United stendur nú fyrir háværum mótmælum í bandarísku höfuðborginni Washington en líkt og hér er það hátt eldsneytisverð sem kveikir aðgerðir.

Vörubifreiðastjórar frá mörgum ríkjum Bandaríkjanna hafa sett stefnuna á Washington en þar hyggjast þeir koma saman og gera vopnabrak og gný mikinn, líkt og íslenskir bændur gerðu á Alþingi á þjóðveldisöld.

Ætlun bifreiðastjóranna er að hringsóla um National Mall-svæðið og halda að því búnu að Robert F. Kennedy-leikvanginum þar sem bifreiðunum verður lagt. Þaðan er svo ráðgert að hópurinn gangi fylktu liði að þinghúsi landsins þar sem mótmælin sjálf fara fram.

Helstu hitamálin eru þær kröfur að ríkisstjórnin hætti niðurgreiðslum til stærri olíufélaga, hefji notkun varaeldsneytisbirgða sem safnað hefur verið upp og hætti útflutningi á olíu frá Alaska.

Búist er við að 350 vöruflutningabifreiðar verði á staðnum vegna mótmælanna og herma frásagnir nærstaddra að ekki heyrist mælt mál fyrir hornablæstri.