Seiðmaður sem drap 42 konur tekinn af lífi

Fjöldamorðinginn Ahmad Suradji, sem var kallaður Seiðmaðurinn, var tekinn af lífi í gær. Ahmad drap 42 konur og ungar stúlku. Hann taldi að drápin færðu honum yfirnáttúrlega krafta.

Aftökusveit skaut Ahmad sem var 57 ára gamall þrátt fyrir beiðni Amnesty International um að fresta aftökunni.

"Hans hinsta ósk var að hitta konuna sína. Við urðum við þeirri ósk," segir Bonaventura Nainggolan saksóknari yfir máli Ahmad.

Seiðmaðurinn var handtekinn árið 1997 eftir að lík fannst skammt frá heimili hans í Norður Súmötru. Nánari leit lögreglu leiddi í ljós önnur 41 lík í nágrenni hússins.

Lögreglan taldi að fórnarlömb Ahmad hefðu komið til hans því þau trúðu að hann hefði yfirnáttúrlega krafta. Hann gæti hjálpað þeim í ástarmálum eða gert þau rík.

Ahmad gerði hvorugt. Í staðinn gabbaði hann stúlkurnar út á akur. Hann sagði þeim að það væri hluti af "ritúali" að grafa þau í jörðina upp til mittis þannig að þau sneru að húsi hans. Þegar stúlkurnar gátu sig hvergi hreyft kyrkti hann þær.

Við yfirheyrslur hélt Ahmad því fram að drápsæðið sem náði yfir ellefu ár og kostaði 42 konur lífið hefði aukið galdramátt hans.

Kona Ahmad var einnig dæmd til dauða fyrir að hafa verið vitorðsmaður hans. Dómi hennar var hinsvegar breytt í ævilangt fangelsi.

Trúa á galdra og hið yfirnáttúrlega er útbreidd í Indónesíu. Sérstaklega á svæðum þar sem fátækt er mikið. Annar "galdramaður" bíður dóms í fangelsum Indónesíu. Hann er sagður hafa banað átta manns.