Útlagastjórn Tíbets styður ekki truflun á ólympíuhlaupi

Útlagastjórn Tíbeta sagðist í dag ekki styðja það að för ólympíueldsins um heiminn yrði trufluð, líkt og gerst hefur í Lundúnum, París og San Francisco.

Í morgun kom fólk saman í Nýju-Delí til að mótmæla yfirráðum Kínverja í Tíbet, en ólympíueldurinn á að koma til Indlands eftir tæpa viku. Dalai Lama, andlegur leiðtogi Tíbeta, er nú í Japan. Hann sagði við fréttamenn í morgun að hann vildi að Ólympíuleikarnir færu fram. Hins vegar væri kominn tími fyrir kínversk stjórnvöld að gera sér grein fyrir því að ekki dygði lengur að beita ofbeldi.