Stofnandi Saving Iceland sýknaður af eignaspjöllum á löggubíl

14. maí 2008 14:43

Ólafur Páll við héraðsdóm þegar málið var tekið fyrir í apríl. MYND/Stöð 2

Héraðsdómur Austurlands hefur sýknað stofnanda Saving Iceland, Ólaf Pál Sigurðsson, af ákæru um eignarspjöll við Kárahnjúka í júli árið 2006.

Ólafi Páli var gefið að sök að hafa lamið nokkur hnefahögg í vélarhlíf lögreglubifreiðar með þeim afleiðingum að hún beyglaðist. Atvik málsins voru þau að lögreglubifreið var ekið í átt að mótmælendum við Snæfell en vitnum ber ekki saman um hvort bílnum hafi viljandi verið ekið á nokkrum hraða á Ólaf Pál, eins og hann heldur fram, eða hvort hann hafi lamið á vélarhlíf bílsins og með því valdið skemmdum á bifreiðinni.

Um var að ræða bílaleigubíl sem ríkislögreglustjóri hafði tekið á leigu hjá Bílaleigu Akureyrar. Fór ríkislögreglustjóri fram á bætur fyrir viðgerðina á bílnum, samtals rúmlega 90 þúsund krónur

Í dómnum segir að í málinu hafi ekki verið lagðar fram ljósmyndir af skemmdum á bifreiðinni, sem samkvæmt framburði eins lögreglumannanna virðast þó hafa verið teknar af skemmdunum og afhentar þeim lögreglumanni sem annaðist rannsókn málsins.

„Þá hefur ekki farið fram mat hlutlauss aðila á tjóni því, sem talið er að hafi orðið á bifreiðinni og þá virðist raunverulegur viðgerðarkostnaður ekki liggja fyrir. Í málinu verður ekki byggt á mati og samantekt eiganda bifreiðarinnar á ætluðu tjóni á henni, sem auk þess virðist hafa farið fram tveimur mánuðum eftir að atvik málsins áttu sér stað," segir einnig í dómnum.

Þá segir í dómnum að framburður fjögurra lögreglumanna um að vélarhlíf bifreiðarinnar hafi dældast eftir högg Ólafs sé ekki fullnægjandi sönnun um að spjöll hafi verið unnin á bifreiðinni enda fái framburður þeirra ekki stuðning í skjallegum sönnunargögnum, svo sem mati dómkvaddra matsmanna eða sundurliðuðum reikningi frá viðgerðarverkstæði, sem hæglega hefði mátt afla og leggja fram í málinu. Því sé ekki hafið yfir skynsamlegan vafa að Ólafur Páll hafi valdið tjóninu.

Mest lesið

Fleiri fréttir